[婚禮場地。提防貨不對辦] My Seasons 四季薈

其實間野同我無仇無怨
只係佢真係好取巧, 個人覺得幾伏
之前已經諗住打返一篇 --一直放置左--
呢排見到新聞又提起有人投訴某d婚禮公司: 婚禮服務不對辦
所以打返一篇文出來

-----------------------

My Seasons係一間婚禮場地提供公司
佢有幾個場, 幾中兩個場係九龍塘痴住

約半年前去婚展時見到呢間野,
我地要搵d場唔可以太細 其實婚展入面每間問下d場可以坐到幾多人, 都無乜得選擇
(一唔係太貴就太細, 一係就山卡啦)
見佢d booth呀, catalogue呀, 相呀都好靚
真係會比佢吸引左
其中一個場(my palace)都夠大
咁就mark低住先啦

佢又時不時都搞open day
咁我地就打算之後個次既open day去八卦下 (@三月)

行完婚展個日返到屋企上網search下佢咩料,
已經見到好多負評同貨不對辦
其中見到有人話一個最大既問題:
佢既食物係"到會"既

咁我唔知真定假啦, 但有得呢個嫌疑
根本已經唔需考慮了
所以之後既open day真係純八卦下佢個場

------------------------------

My Seasons賣點係教堂式既場地, 玻璃屋, 總之就係仿行高貴路線(?
點知連個場個人覺得都係伏既


一齊來睇下美好既宣傳照:




好似好靚咁去左唔知邊個小島咁(?
要讚下攝影師


現實:

 

只不過係九龍塘條馬路隔離一間屋
痴線真係痴住條馬路(?)
仲要係大陸feel (無論室外或室內佈置)

一入去就係d sofa, 桌球枱, 酒吧+望到條行去場地既走廊 (無錯係全部係晒同一個地方)
(由於無影到呢個位我唯有用返佢張圖, 咁呢張圖又幾老實既, 係影出來wide d又加左filter je)
 

嗱呢個仲唔係客廳? (樓底都係客廳高度)
一個大陸住宅feel (無佈置得來又要擺d浮誇傢俬)
置身其中係感覺周圍都白sao sao, 又好似好空咁

睇相可能無乜野, 
但想像下如果係一個婚禮場地,
經過上面個教堂式白牆建築大門後一入就係"一個客廳"
都唔可以唔打個突


而呢條走廊: (即係上圖客廳中間偏右位置果對門個位)

就係行入婚禮場地既路!  (重申: 樓底都係住宅高度)
果兩個人企緊果個位就係場地入口!

....個人覺得真係有d寒酸

而入到去:



真係一眼睇晒 (而且樓底真係好矮)
嗯...睇返我都覺影出來影到大左高左tim....總之實際去到感覺係好矮la
呢個係一間屋入面好大既房lo


重點係佢場地平面圖好似唔係好按現實繪畫(?
以下係佢catalogue既平面圖 (中間係無柱的)



再睇返實物圖: 兩大條柱係正中心


嘛, 我都係做design既, 地圖呢d有時唔跟比例之類, 明既~
人地又無話係依足, 無錯無錯
如果唔係去左個場睇真係唔知原來係咁lo



因為懷疑佢d野係到會,
所以我地仲專登問staff廚房係邊, 係邊到出菜
佢又真係有指比我地知廚房係邊到
不過佢答個陣好似有d取巧避開, 又無詳細講
我地都無問到咁白 "野食係咪個到煮?"
咁如果用來加熱d野食, 都可以稱之為廚房既


然後問新娘房係邊
竟然係經過走廊時已經行過左既另一扇門!


再倒帶睇下:

無錯!相片正中間對白色門一開就係新娘房!

即係當d賓客係經過條狹窄走廊入會場時
(如果新娘房門打開一下) 隨隨便便路過就會望到
哈哈哈....
係咪覺得好有問題...




仲要唔知點解有張床係入面!
(又係好符合浮誇+空曠感既大陸feel既....)



----------------------------------------------------------------------------

呢次參觀簡直係大開眼界
體會到影相既威力有幾咁大


隔離係my garden (聽聞而家好似因某d問題要拆了, 唔清楚)
個場因為本身唔夠大(for us), 個staff都無諗住帶我地參觀埋lo
我地只好走個時入去觀望兩眼
呢個外觀睇落又無咁伏既(雖然同相都係有差距)

又來美好既宣傳照




現實:
(同係痴住條馬路直入就係)

     

不過如果行入去應該又係勁細

----------------------------------------------------------------------

如果係實際睇完場, 應該唔會有人book lo.....
無睇過場只睇相就book就話je
其實都唔知佢做乜要搞open day咁樣暴露自己

留言

  1. 講到咁誇張既. 我都係BOOK左呢度, 我中學, 同事都係唔同時候呢2年簡左呢度, 都係睇左場先BOOK既,最緊要係個場夠靚,關條馬路咩事,可能大家睇既野唔同啦, 反而我一入到去我同我男友都好鐘意.

    回覆刪除
    回覆
    1. 的確每個人睇野唔同, 着眼點唔同
      我同我老公都覺得個場唔"靚", d裝飾為擺而擺反而顯得太俗套, 太假了
      但擺酒最體會到既end user其實係賓客
      我post呢篇都只係想比大家多個方向留意

      我有fd黎緊年尾都bk左呢到呀, 睇下到時我去完會唔會有咩感想

      刪除
  2. 我自己來緊呢個星期六就會在 My Place 舉行證婚酒會,我地睇場同book前已問了酒會食物是到會定現場主理,佢地都好直接回答了是到會,佢地個廚房唔係“溜的”,如果擺酒的是佢地有廚在場地廚房主理的,其實公道講句自己選擇時有無問清楚,自己無問事後發現又唔好認定是人地有心瞞騙,而自己都要清楚自己有d咩concern問清楚睇清楚適唔舒合,付唔付合自己要既野,我個人覺得無絕對100%理想的,感覺同選擇都係好個人的。

    回覆刪除
  3. 你咪嚇我,我出年都book咗呢度!

    回覆刪除

張貼留言

這個網誌中的熱門文章

[婚禮籌備] 教堂行禮 - 中大崇基禮拜堂 有關種種

生存報告